صلاة الله عليك ملجاي
أحمد بلسمي وشفاي
أدعوك يا عليم جواي
أقبل لنداي ودعاي
سدد في مديحو خطاي
وأشوفو في منامي رؤاي
ثنيت بسيد السادات
طه منور الساحات
خضر من وضوءه نبات
وربي أحيا ليهو المات
وضوع سيد البشر يا أحباب
جاء طاهر زكي الأنساب
وإنهد القصر صار تراب
وشال من كل سمانا ضباب
نبينا المصطفى الأمي
سيد روحي أبي وأمي
حبو في عروق دمي
مرادي جواره وكل همي
يا طب الروح والأجساد
حبك في القلوب يزداد
يا للناس ساس وعماد
وليك كل الخلوق تنقاد
زاكي الريح تقول ند
وردي وأزهر الخد
رحيب الكف واليد
وللمسكين دوام يدي
وين زيك مثيل معدوم
وفيك أرواحنا ديما نسوم
ربي حباك منه علوم
وليك الشئ الخفي معلوم
أيه عديدة خذو تذكار
إن دعا للشجر له سار
وطاع ليهو القمر حين شار
ورده بمسيسو أبصار
رسولي قبلتي وملجاي
غاية أملي فيك ورجاي
يوم الحر يكون شواي
القاك في حداي وكفاي
برقا في الظلام لي لاح
سدد في قليبي رماح
متين أنا يا النبي المصباح
أزورك وتشفى لي جراح
صلاتي للنبي المكرم
بي عد ما صاح وبكى مغرم
بجاهو في الميعاد نرحم
وزمزم بالمديح تكرم