كنز الرحمة المهداة
بشراك بيهو يا أمة
بيك في الآخرة نلقي نجاة
بديت باسم الله بالفتاح
خالق ذاتنا والأرواح
أوهب لي منك صلاح
وأنظم مدحو ليل وصباح
ثنيت بالنوره ضاوي
نبينا اللقيم حاوي
حبك في القلوب ثاوي
وشوقك للعقول شاوي
وضوعك يالنبي المبرور
نزلت ليك حسان الحور
طاب الكون عماهو سرور
وبالرحمات صبح مغمور
فاتح بابو ما مسدود
بالخيرات كفوفو تجود
حنينا في طباعه ودود
وضما للجزع والعود
يوم الوقفة والطامة
وأمما في حواك لامة
وأناسا من عذاب هامة
جاهك بشمل العامة
لواء الحمد ليك معقود
وفي النبيان بترقى تسود
تسجد سجدة للمعبود
وتشفع لينا غير قيود
كل الخلق بيك تلوذ
يا باب النجاة والفوز
صراطنا المستقيم بنجوز
وجنان الخلد بيك نحوز
برقا من رياضو يلوح
أعيا للفؤاد والروح
بدمع الشوق عيوني تبوح
متين يارب ليهو أروح
صلاة الله علي الممدوح
تملأ الكون شذاها يفوح
زمزم تشفي ليها جروح
وأجعل لي بمدحو فتوح
