طه يا سيد الأطباء
روحي زايدة فيك محبة
مولاي قاسم الأرزاق
حاكما في ملكه باقي
ناظر الجوف والمآقي
وعالم السر والمخبا
بثني بناير الجبين
الحبيب بهجة سنين
الحبو زادي وهو ديني
وبكفو أجعل لي شربة
في ربيع جانا بشرى
نوره ضوا لاح لبصرى
وإنهدم أيوانو كسرى
واللعين طار وإستخبا
للرسول القدره سامي
يا فؤاد أحكيو غرامي
الحنين في جوفي نامي
وفي قلبك أجعل لي محبة
في الوجه قسيم وسيمو
وكالغمام في تبسيمو
لو نظرة طرفي بس يشيمو
ده القمر من حسنه غبا
أزهر اللون والخدود
للعز حائز وكل جدود
يوم ما تحشر الوفود
في جاهك نحن يا المنبا
الرسول زريع المشية
من مولاه دائم الخشية
قلوبنا بيهو جد منتشية
وبالقيم لارواحنا ربة
نبينا يخدم ضيفو حافي
وباليتيم يحن يرافي
وللهو دوام مجافي
من صغير قام وشبا
الجزع حنالو باكي
وبأنينو وشوقو حاكي
والجمل الجالو شاكي
من شقاوة زالو كربة
الصحابة البيهم هدانا
كالنجوم ضوا دجانا
كالكرار وأبو دجانا
قلبي ليهم والله حبة
هب لي طيبو زاكي
والطريف من شوقو باكي
في قربه زمزم بس شفاك
وأنت روحي وأنت طبا
آلاف صلاه مع سلامي
للحبيب مصباح ظلامي
ذنبي مانع من قيامي
ربي سهل وليهو أعبا
